Asoléyase la Rede Africana d’Epidemioloxía de Campu (AFENET). El so oxetivu ye reforciar los programes de formación n’epidemioloxía n’África

Naz la ornitóloga Leonora Jeffrey Rintoul. Trabayó bien de décades xunto a Evelyn Vida Baxter, estudiando, ente otros, los movimientos de les aves en La Islla de May

Naz la bioquímica Ilona Banga. Codescubrió l’actomiosina y la primer elastasa. Tamién carauterizó cómo l’actina y la miosina interaicionen pa producir la contraición muscular

Establezse’l Día Mundial contra’l Cáncer. Nesti día, organizaciones y persones de tol mundu xúntense pa concienciar sobre’l cáncer y facer d’él una prioridá de salú pública

Créase n’Arxentina’l Conseyu Nacional d’Investigaciones Científiques y Téuniques (CONICET). El primer presidente foi Bernardo Houssay, Premiu Nobel de Fisioloxía o Medicina

Williamina Fleming descubre la nebulosa Cabeza de Caballu. En 1881 entrara como auxiliar temporal nel observatoriu del Harvard College, onde acabó realizando numberosos descubrimientos

Naz la viróloga Nubia Muñoz Calero. Trabayó na identificación del virus del papiloma humanu como causante del cáncer de cuellu uterín, un pasu clave pa desenvolver la vacuna contra esta enfermedá

Muerre la micóloga Gillian Fiona Laundon, conocida pol estudiu de les royes, fungos patóxenos de plantes, y por crear un sistema nuevu pa la terminoloxía d’espores

Naz l’arqueóloga Ann Axtell Morris. Foi una collaboradora importante na xera de documentar y reconstruyir El Templu de los Guerreros nel sitiu arqueolóxicu de Chichén Itzá en Yucatán

Muerre l’astrónomu Eugène Michel Antoniadi. Foi un observador destacáu y un firme críticu de la hipótesis de les canales de Marte

Célebrase’l primer Día Internacional de la Muyer y la Neña na Ciencia. Esti día busca reconocer el papel críticu de muyeres y neñes na ciencia y la teunoloxía

Muerre’l pianista George Antheil. Foi coinventor, xunto cola inxeniera y actriz Hedy Lamarr, d’una teunoloxía considerada precursora de les conexones inalámbriques como’l wifi

Faise públicu’l descubrimientu en Madrid de dos códices perdíos de Leonardo da Vinci, con diseños de máquines, fortificaciones y trataos de mecánica d’un gran valir históricu

Sintetízase’l lawrenciu (númberu atómicu 103) nel Llaboratoriu Nacional Lawrence Berkeley. Nel 1992, la IUPAC reconoció al Institutu Central d’Investigación de Dubná como codescubridor d’esti elementu

La física Nashwa Eassa recibe’l Premiu Fundación Elsevier pa moces científiques de países en desenvolvimientu pola so investigación al rodiu de la reducción de l’acumulación de película en semiconductores d’alta velocidá

Naz l’arqueóloga Anna-Liisa Hirviluoto. Especializóse na Edá de Fierro en Finlandia, destacando los sos trabayos nel xacimientu de Ristimäki en Turku o nel cementeriu viquingu de Yläne

Naz el matemáticu y astrónomu James Ivory. Fundamentó’l teorema d’Ivory sobre seiciones cóniques confocales

Muerre l’astrónomu, matemáticu, musicólogu y traductor Thábit ibn Qurra. Fundó una escuela de traductores del griegu al árabe, clave pa la tresmisión de testos d’Arquímedes, Euclides o Ptolomeo

Naz l’agrónomu, micólogu y promotor del esperantu Paul Neergaard. Consideráu’l padre de la patoloxía de semientes, términu qu’acuñó xunto cola escocesa Mary Noble nos años 1940

Naz la psicóloga y abogada Sarah Elizabeth Marston. Atribúise-y, xunto al so home William Marston, el desenvolvimientu de la midida de la presión arterial sistólica pa detectar l’engañu

Muerre la sismóloga danesa Inge Lehmann. Descubrió la discontinuidá que lleva’l so nome, demostrando la existencia del nucleu internu sólidu de la Tierra

Naz la física Lorella Margaret Jones. La so investigación centróse na física d’alta enerxía, sobre manera na fuercia que xunta les partícules nucleares colos quarks

El grupu de radioastronomía de la Universidá de Cardiff anuncia’l descubrimientu d’una galaxa formada cuasi dafechu por materia escuro. La so particularidá ye que nun paez que contenga estrelles

Naz l’esplorador Ibn Battuta. Ye famosu pola so obra La Rihla d’Ibn Battuta, onde documenta los sos viaxes a lo llargo de más de 100.000 km, que ye una fonte fundamental de conocimientu sobre la dómina

Fúndase l’Axencia Espacial Africana (AfSA). Con sede n’Exiptu, encárgase de promover la cooperación ente les polítiques espaciales de los estaos miembros de la Xunión Africana

Inaugúrase’l Bancu Mundial de Semiente de Svalbard o Cámara Global de Semiente. Esti almacén soterrañu caltién semiente de miles de plantes de tol mundu

Naz el sociólogu y filósofu George Herbert Mead. Considérase ún de los precursores del pragmatismu y una gran influyencia pal desenvolvimientu de les teoríes funcionalistes

Los físicoquímicos Martin Kamen y Sam Ruben descubren el carbonu-14. Esti isótopu radioactivu del carbonu úsase davezu pa determinar la edá de materiales orgánicos