Naz Wilhelmine Mimi Johnson. Foi la primer xeóloga de Noruega, fotografió mines en Kongsberg y foi conservadora del Muséu Xeolóxicu de Tøyen. Abrió camín nun mundu domináu por homes

L’astrónomu Karl Wilhelm Reinmuth descubre l’asteroide Aethusa (1064), asitiáu nel cinturón principal ente Marte y Xúpiter. Nomóse asina por una planta tóxica europea

Naz la química Carmenza Duque Beltrán. Conózsela sobre manera poles sos investigaciones sobre l’arume de les frutes y los compuestos químicos presentes nos organismos marinos

Naz Eeva Therman-Patau. Espublizó abondo sobre xenética del cáncer, anomalíes del cromosoma X y desenvolvimientu sexual, ente otros temes

Naz el filólogu, llingüista y naturalista Ivar Aasen. Estableció un estándar d’escritura pa la llingua noruega (landsmål) a partir de los dialeutos del oeste del país, adoptáu como oficial nel 1885

Naz la viróloga Ana Gligić. Fixo importantes contribuciones a la comprensión y control de les fiebres hemorráxiques virales, incluyendo’l virus de Marburgu

Naz la ictióloga Elly Cordiviola. Foi precursora nel estudiu de los peces del ríu Paraná, les sos migraciones y la so reproducción. El so trabayu ayudó a caltener la biodiversidá acuática arxentina

Naz la bióloga Jeanne Renaud-Mornant. Descubrió decenes d’especies de tardígrados, animales microscópicos que son a sobrevivir en condiciones estremes

Muerre l’horticultor Edmond Albius. Con 12 años, inventó’l métodu de polinización de la orquídea Vanilla planifolia, qu’inda anguaño permite’l so cultivu rentable fuera del so hábitat natural

Naz la bióloga Mary Alice McWhinnie. Foi la primer muyer en navegar a lo llargo de dos meses nel Antárticu. El so oxetivu yera estudiar la rellación ente la temperatura del agua y la fisioloxía del kril

Naz la médica Ruth Wynne-Davies. Especialista n’ortopedia, investigó y escribió sobre la xenética del pie equinovaru y la escoliosis

Tien llugar un eclipse solar total. Pue vese nel estremu norte de Siberia, l’estremu oeste d’Islandia, la islla de Groenlandia y gran parte del norte d’España

Naz la xeóloga Maureen Muggeridge. Nel 1979 descubrió’l depósitu de diamantes d’Argyle, nel norte d’Australia Occidental, ún de los más grandes del mundu

Naz el polímata Carlos de Sigüenza y Góngora. Foi ún de los promotores de les matemátiques na Nueva España y dirixó les escavaciones de Teotihuacán en 1675, les primeres del Méxicu virreinal

Naz l’ayudante de llaboratoriu Andromache Papanicolaou. A lo llargo de 21 años, foi voluntaria pa que’l so home George-y realizara citoloxíes diaries na busca d’una prueba pa detectar el cáncer d’úteru

Naz Arthur Cayley, matemáticu británicu creador del cálculu matricial, base del álxebra llinial. Espublizó más de 900 artículos y revolucionó la xeometría

Philiswa Nomngongo recibe’l Premiu a les Muyeres na Ciencia en Suráfrica. Investiga la química analítica ambiental y l’usu de nanomateriales pal tratamientu y análisis d’agües

Día Internacional de l’Arqueoloxía. Esta ciencia de la rama de les humanidaes permite entender el nuesu pasáu y presente. La fecha recuerda l’asesinatu del arqueólogu siriu Khaled al Asaad

Les perres Belka y Strelka viaxen al espaciu esterior nel Korabl-Sputnik 2, acompañaes de ratones, rates y plantes. Fueron los primeros seres vivos en sobrevivir a un viax espacial

Ronald Ross observa’l parásitu de la malaria nun mosquitu Anopheles. El so descubrimientu ayudó a entender cómo se tresmite la enfermedá. Ganó’l Premiu Nobel de Fisioloxía o Medicina nel 1902

Naz el químicu Charles Frédéric Gerhardt. Trabayó na reforma de la notación de les fórmules químiques. Tamién estudió, ente otros, la síntesis del ácidu acetilsalicílico, base de l’aspirina

Naz el bioquímicu Christopher J. Chetsanga. Fixo contribuciones pioneres nel estudiu de la reparación del ADN, descubriendo encimes clave nesti procesu esencial na llucha contra’l cáncer

Naz la física y meteoróloga Anna Mani. Diseñó instrumentos pa midir radiación solar, ozonu y vientu, esenciales pa entender el clima y les enerxíes llimpies

Naz la entomóloga Annette Braun. Foi una reconocida esperta en microlepidópteros, poliyes pequeñes que viven dientro de fueyes. Describió más de 340 especies y revolucionó la entomoloxía

Muerre l’arquiteutu ya inxenieru Eugénio dos Santos. Foi responsable de la reconstrucción de Lisboa tres del terremotu del 1755, siguiendo criterios antisísmicos que marcaron un fitu na inxeniería

Naz la programadora Karen Spärck Jones. Desenvolvió l’indicador IDF, que mide la relevancia d’una pallabra nun testu pa identificar información clave en documentos dixitales

Naz la inventora Carrie Jane Everson. Patentó un métodu pa separar minerales usando burbuyes d’aceite, base de la flotación por espuma. La so téunica revolucionó la minería moderna

Día Mundial del Síndrome de Turner, una anomalía cromosómica descrita por Henry Turner nel 1938. Afeuta a persones de sexu femenín y pue causar baxa estatura o infertilidá, ente otros efeutos

Naz la filóloga Maria Goyri. Foi precursora na filoloxía y la lliteratura española. Defendió la educación de les muyeres y estudió’l romanceru popular xunto a Ramón Menéndez Pidal

La ONU confirma la eliminación de la gasolina con plomu a nivel mundial. Esti llogru evita más de 1,2 millones de muertes añales y aforra más de 2,4 billones de dólares

Naz la médica y pedagoga Maria Montessori. El so métodu educativu, usáu en tol mundu, fomenta l’autonomía infantil y el deprendimientu al traviés de la esperiencia